Другая персанальная выстаўка Ягора Батальёнка прадстаўлена ў галерэі «АртХаос»
«Жывапіс – гэта малітва без словаў,
Дзе колер крычыць, і баліць, і спявае.
На кожным палатне – жыцця першааснова,
Якую мастак для сусвету адкрывае».
Рыгор Барадулін
З 14 кастрычніка па 4 лістапада ў мастацкай галерэі «АртХаос» будзе праходзіць выстаўка жывапісу беларускага мастака Ягора Батальёнка «Абярэг». Гэта не першая дэманстрацыя творчасці майстра на пляцоўцы галерэі. Папярэдні праект быў арганізаваны ў 2018 годзе і атрымаў прыемныя водгукі, што і стала адной з прычын паўторнага паказу ўнікальнага жывапісу творцы.
Прырода і жывапіс цесна звязаны, нездарма яна з’яўляецца адной з галоўных крыніц натхнення для дзеячаў мастацтва. Прырода абуджае творчыя сілы праз бясконцую разнастайнасць формаў, святла і колераў. Адлюстраванне на палатне лясоў, палёў, рэк і неба дазваляе мастаку перадаць веліч і зменлівасць навакольнага свету. Ісаак Левітан бачыў у пейзажы стан душы: «Пейзаж не павінен быць толькі жывапісам... у ім павінен быць настрой, які кранае». Творчасць Ягора Батальёнка – гэта пейзажны жывапіс, прысвечаны прыродзе ўлюбёнага краю мастака. Пераважна палотны ўяўляюць лірычныя пейзажы, сузіранне якіх здольна выклікаць цэлую гаму пачуццяў – ад прымірэння да драматызму. Мастацтва аўтара гаворыць на мове вобразаў і метафар, дзе сімвалізм і колер, дапаўняючы адзін аднаго, ствараюць непаўторны стыль і раскрываюць асаблівы характар жывапіснай манеры.
Выстаўка мае назву «Абярэг». Згодна з разважаннямі Ягора Батальёнка, у дахрысціянскую эпоху абярэгам служылі прадметы, якія, паводле народных уяўленняў, абаранялі чалавека ад хвароб, бед і злых сіл. Такія рэчы вырабляліся з даступных матэрыялаў – гліны, костак жывёл, металу, дрэва і інш. З развіццём выяўленчага мастацтва гэтую ахоўную функцыю, канечне, у пераносным значэнні, можа выконваць карціна. Менавіта ў свае творчыя працы, з увасобленымі паэтычнымі вобразамі роднай прыроды, напоўненымі шчырасцю і духоўнасцю, мастак укладае асаблівую мэту – служыць прататыпам «абярэгу» для яе ўладальніка.
Выстаўка прадоўжыцца па 4 лістапада 2026 г. Уваход вольны. Мастацкая галерэя «АртХаос» запрашае наведаць выстаўку, а таксама набыць любы з прадстаўленых твораў.
Батальёнак Ягор Ягоравіч нарадзіўся ў 1946 г. у в. Вялікія Труханавічы Чашніцкага раёна Віцебскай вобласці (Беларусь).
Скончыў мастацка-графічны факультэт Віцебскага дзяржаўнага педагагічнага інстытута імя С. М. Кірава (1968).
Сябра Беларускага саюза мастакоў.
Лаўрэат Першай прэміі прадстаўніцтва ААН у Беларусі за жывапісны твор «Сувязь» (1996).
Творы Ягора Батальёнка знаходзяцца ў калекцыях Нацыянальнага мастацкага музея Рэспублікі Беларусь, Нацыянальнага цэнтра сучасных мастацтваў Рэспублікі Беларусь, Магілёўскага абласнога мастацкага музея імя П. В. Масленікава, Нацыянальнага Полацкага гісторыка-культурнага музея-запаведніка, Гродзенскага дзяржаўнага гісторыка-археалагічнага музея, гісторыка-культурнага музея-запаведніка «Заслаўе», Чашніцкага гістарычнага музея, Светлагорскай карціннай галерэі «Традыцыя» ім. Г. Пранішнікава, Табольскага гісторыка-архітэктурнага запаведніка, Яраслаўскага мастацкага музея, Музея і Цэнтра беларускай культуры ў Гайнаўцы (Польшча), Беларускага музея ў Нью-Йорку, Музея сучаснага рускага мастацтва ў Нью-Йорку, Культурна-асветніцкага цэнтра «Полацк» у Кліўлендзе (ЗША), Беларускага саюза мастакоў, Нацыянальнай бібліятэкі Беларусі, Міністэрства культуры Расійскай Федэрацыі, у прыватных калекцыях Беларусі і за мяжой.
Дата публикации: 20.10.2026